پکتیا؛ نیازیو لوبډلو د شپږو ولایتونو ترمنځ د والیبال سیالیو اتلولي وګټله
د پکتیا ولایت د بدني روزنې او ورزش ریاست اړوند د والیبال فدراسیون د استازولي له لوري د شپږو ولایتونو ۴۳ لوبډلو ترمنځ د والیبال سیالۍ د نیازیو لوبډلې په اتلولي پای ته ورسېدې.
په دغو سیالیو کې د پکتیکا، کابل، لوګر، غزني، خوست او میدان وردګ ولایتونو څخه ۴۳ لوبډلو ګډون کړی و، چې پایلوبه یې د کابل موسهي او پکتیا نیازیو لوبډلو ترمنځ ترسره شوه.
د دغو سیالیو پایله کې د نیازیو لوبډلې د ۳/۲ میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دغه سیالۍ چې ۳۱ ورځې یې دوام وکړ په پای کې یې اتلې لوبډلې ته ۲۰ زره افغانۍ او دویم مقام لوبډلې ته پنځه زره افغانۍ د ډالۍ په توګه ورکړل شوې.
