پکتيا؛ په احمد خېلو ولسوالۍ کې د والیبال سیاليو اتلولي د خوازکو لوبډلې وګټله
دپکتيا ولايت د بدني روزنې او سپورټ رياست ترچتر لاندې او د دې ولایت د والیبال فدراسیون د استازولۍ په همغږۍ په احمد خېلو ولسوالۍ کې د ۲۶ لوبډلو ترمنځ د والیبال سیاليو اتلولي د خوازکو لوبډلې وګټله.
یادې سېالۍ، چې د احمد خېلو ولسوالۍ شوات سيمې ځوانانو لخوا پیل شوې وې، پای لوبه یې د خوازکو او احمدخېلو لوبډلو ترمنځ ترسره شوه، چې خوازکو لوبډلې وکولای شول چې خپلې سیالې لوبډلې ته ۳/۲ میدانونو په توپیر ماتې ورکړي.
دغه سیالۍ چې ۱۵ ورځې ېې دوام وکړ موخه یې ورزش ته وده ورکول وه.
په پای کې ګټونکې لوبډلې ته موټر سایکل، غوره لوبغاړو ته کالي او ستاينليکونه ورکړل شول.
