هلمند؛ ناوې ولسوالۍ کې د ټېپ بال کرېکټ اختريزې سيالۍ پيل شوې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ناوې ولسوالۍ په خلچ سیمه کې د ۱۲ لوبډلو ترمنځ د ټېپ بال کرېکټ اختريزې سيالۍ پيل شوې.
د يادو سياليو پيليزه لوبه د عزيزي اتحاد او اڅک اتحاد لوبډلو ترمنځ وشوه، د لوبې پچه اڅک اتحاد لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې خپلې سيالې لوبډلې ته د ۱۹۰ منډو هدف کېښود، په ځواب کې عزيزي اتحاد لوبډلې ياد هدف په وروستي اور کې ترلاسه کړ او لوبه يې د درېيو ویکټو په توپیر وگټله.
دا سیالۍ د ځوانانو د يووالي په موخه ترسره کېږي او ۶ ورځې به دوام وکړي.
