ننگرهار کې د سويل ختيځ زون په کچه د فوټبال سيالۍ پيل شوې
د ننگرهار ولايت د بدني روزنې او ورزش رياست په همکارۍ، د فوټبال ملي فدراسیون له لوري د ياد ولايت په مرکزي سټډیوم کې د شپږو ولايتونو په گډون د سويل ختيځ زون په کچه د فوټبال سيالۍ پيل شوې.
په يادو سياليو د خوست، ميدان وردگ، لغمان، نورستان، پکتيا او کوربه ننگرهار ولايت لوبډلو گډون کړی، چې په پيليزه لوبه کې خوست آريانا لوبډلې خپلې سيالې ميدان وردگ زيولات لوبډلې ته د ۹ پر صفر ميدانونو په توپير ماتې ورکړه او بريا يې خپله کړه.
دا سيالۍ سويل ختيځ زون څخه د افغانستان اتلانو غوره ليگ راتلونکي پړاو ته د غوره لوبډلې ټاکلو په موخه ترسره کېږي، چې شاوخوا دوې اوونۍ به دوام وکړي.
