ننگرهار؛ نازيان ولسوالۍ کې د ۱۴ لوبډلو ترمنځ د ټېپ بال کرېکټ سيالۍ پای ته ورسېدې
د ننگرهار ولايت د بدني روزنې او ورزش رياست اړوند د شينوارو شپږگونو ولسواليو ورزشي مدیریت له لوري د نازیان ولسوالۍ په چوک لوبغالي کې د ۱۴ لوبډلو ترمنځ د ټېپ بال کرېکټ سيالۍ، چې يوه مياشت مخکې پيل شوې وې د ۲۵ ويالې سټار لوبډلې په اتلولۍ پای ته ورسېدې.
د يادو سياليو پايلوبه د ۲۵ ويالې سټار او کېنگ سټار لوبډلو ترمنځ ترسره شوه، ۲۵ ويالې سټار لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د شپږو لوبغاړو په سوځېدو سره سيالې لوبډلې ته د ۱۷۱ منډو هدف وټاکه، په مقابل کې کېنگ سټار لوبډلې د اتو لوبغاړو په سوځېدو سره ۱۶۹ منډې وکړې او لوبه يې د ۲ منډو په توپير وبايلله.
د يادولو وړ ده، چې د دغو سياليو په پای کې اتلې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
