ننگرهار؛ سيف الله آباد لوبډلې د گوشتې ولسوالۍ د ټېپ بال کرېکټ غوره ليگ سياليو اتلولي وگټله
د ننگرهار ولايت د بدني روزنې او ورزش ریاست په همغږۍ د دې ولایت په گوشتې ولسوالۍ کې د ۴۸ لوبډلو ترمنځ د گوشتې ټېپ بال کرېکټ غوره ليگ (GPL) سيالۍ، چې شاوخوا ۴۰ ورځې مخکې پيل شوې وې د سیف الله آباد لوبډلې په اتلولۍ پای ته ورسېدې.
د دغو سياليو پايلوبه د خيربندي اتلانو او سيف الله آباد لوبډلو ترمنځ وشوه، د لوبې پچه سیف الله آباد لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د پنځو لوبغاړو په سوځېدو سره خپلې سيالې لوبډلې ته د ۱۴۳ منډو هدف کېښود، په ځواب کې خيربندي اتلانو لوبډلې د ټولو اورونو په لوبولو سره ۱۳۱ منډې وکړې او لوبه يې د ۱۲ منډو په توپير وبايلله.
د يادو سياليو پای کې د مسؤلينو له لوري اتلې لوبډلې ته يو عراده موټرسایکل او دويم مقام گټونکې لوبډلې ته کپ ورکړل شو.
