عمان هوتک او فردوس نجیبي د سوک وهنې اسیایي سیالیو کې خپلو سیالانو ته ماته ورکړه
د افغانستان د سوک وهنې ملي فدراسیون دوو پیاوړو سوک وهونکو عمان هوتک او فردوس نجیبي د سوک وهنې اسیا جام سیالیو کې خپلو سیالانو ته په ماتې ورکولو سره د دغو سیالیو پایلوبې ته ووتل.
په دغو سیالیو کې له ځوانانو څخه عمان هوتک په ۹۲ کیلو ګرامه وزن کې عراقي سیال، فردوس نجیبي په ۸۰ کیلو ګرامه وزن کې عربستاني سیال ته ماته ورکړه؛ خو عبدالله بهیر قیومي په ۴۹ کیلو ګرامه وزن کې هندي سیال ته سیالي بایلوده او له سیالیو څخه بهر شو.
همدا راز د ۲۲ کلونو کم عمره ورزشکارانو له کټګورۍ څخه مجتبی شریفي په ۹۲ کیلو ګرامه وزن کې د سیال د نه پیدا کېدو له امله نېغ په نېغه پایلوبې ته ووت.
دغه سیالۍ د سریلانکا په کوربتوب د روانې میلادي میاشتې پر ۱۲مه پیل شوي او د همدې میاشتې تر ۲۵مې نېټې به دوام وکړي.
