کابل؛ پغمان ولسوالۍ کې د ٣٠ ورزشکارانو ترمنځ د ګلف ملي ټاکنیزو سیالیو لومړی پړاو سیالۍ پای ته ورسېدې
د المپیک، بدني روزنې او ورزش عمومي ریاست اړوند د ګلف ملي فدراسیون له لوري د پغمان ولسوالۍ قرغې سیمه کې د ٣٠ ورزشکارانو ترمنځ د ګلف ملي ټاکنیزو سیالیو لومړی پړاو سیالۍ پای ته ورسېدې.
په دغو سیالیو کې د ملي لوبډلې او کابل ښار بېلابېلو کلبونو څخه ورزشکارانو ګډون کړی و، چې په پای کې یې حشمت الله سروري لومړی، نور احمد فاضل دویم او محمد نادر درېیم مقام ترلاسه کړ او په ټوله کې لس تنه له کابل څخه ملي ټاکنیزو سیالیو ته وټاکل شول.
ټاکل شوې، چې په بامیان او هرات ولایتونو کې به هم له ورته سیالیو وروسته د درې واړو ولایتونو (کابل، بامیان او هرات) غوره ورزشکارانو ترمنځ د ملي لوبډلې ټاکنیزې سیالې ترسره او تر ټولو غوره هغه به یې د ګلف ملي لوبډلې ته وټاکل شي.
د یادونې وړ ده، چې د دغو سیالیو لومړي مقام ګټونکي لوبغاړی حشمت الله سروري ته د هرات ولایت د ګلف فدراسیون رئیس شکیب حیاتي له لوري نغدي ډالۍ ورکړل شوه.
