د ورزش ادارې عمومي رئيس مولوي احمد الله وثیق د اندونیزیا د فوټسال کمېټې له مشر سره وکتل
د المپیک، بدني روزنې او ورزش عمومي ریاست رئیس مولوي احمد الله وثیق اندونیزیا هیواد ته د رسمي سفر په جریان کې د اندونیزیا د فوټسال کمېټې له رئیس مکایل ویکټور سیانیپار سره لیدنه وکړه.
په دې لیدنه کې د دواړو هیوادونو د فوټسال کمېټو د اړیکو پر پراختیا او د اندونیزیا هیواد د فوټسال په لیګونو کې د افغان ورزشکارانو پر لوبېدو خبرې وشوې.
د خبرو په جریان کې پر دې هم بحث وشو، چې په اندونیزیا هیواد کې د افغان محصلانو او هغو افغانانو لپاره چې په اندونیریا کې ژوند کوي او له فوټسال سره علاقه ولري، د فوټسال د تمریناتو زمینه مساعده شي.
په پای کې توافق وشو، چې د دواړو هیوادونو د فوټسال کمېټو ترمنځ یو هوکړه لیک لاسلیک شي؛ ترڅو د دواړو هیوادونو د فوټسال کمېټو ترمنځ اړیکې دوامداره او بنسټیزې شي.
