د فراه ولایت د بدني روزنې او ورزش امریت د ۱۴۰۲ یم کال د ورزشي فعالیتونو لنډ راپور
فراه ولایت د افغانستان له لویدځو ولایتونو څخه ګڼل کېږي، چې خلک یې د نورو چارو ترڅنګ له ورزش سره زیاته علاقه لري او په دودیزو او عنعنوي لوبو کې یو له غني ولایتونو څخه دی.
د فراه ولایت د بدني روزنې او ورزش امریت په ورزشي ډګر کې یو له فعاله ولایتونو څخه دی، چې په خپلو هڅو سره یې په تېر ۱۴۰۲ کال کې په مرکز او ولسوالیو کې ۱۰۹ لویې او وړې ورزشي برنامې جوړې کړي دي، چې له جملې یې ۴۸ په مرکز او ۶۱ په ولسوالیو کې دي.
په نوموړي ولایت کې د المپیکي ورزشونو ترڅنګ، ملي او دودیز ورزشونه هم ښه مخینه لري او لاهم پکې د خلکو ترمنځ ژوندي پاتې دي لکه د غېږ نیونې دودیزې لوبې، چې خورا زیات مینوال او ورزشکاران لري.
په دغه ولایت کې ۳۲ فدراسیونونه فعالیت لري او په مختلفو برخو کې په مرکز او ولسوالیو کې ۳۶ کلبونه فعاله دي او اوس هم پکې ګڼ ورزشکاران په تمریناتو بوخت دي او ورزش پکې ترسره کوي. د دغه ولایت ورزشکارانو په ۲۳ ولایتي سیالیو کې ګډون کړی دی او ۹۴ مختلف مډالونه یې یاد ولایت ته راوړي دي.
د بیا رغوونې په برخه کې د ۳۳۰۱۱۰ افغانیو په ارزښت د نوموړي امریت په ورزشي سټدیوم کې د اوبو څا کېندل شوې او همداراز د یاد ستډیوم د مسطح د بیا رغېدو چارې بشپړې شوې دي.
هېره دې نه وي چې په نوموړي ولایت کې د ورزش د ودې په موخه په مختلفو برخو کې ۷ ورزشي سیمنارونه هم ترسره شوي دي.
