د بډمنټون ملي فدراسیون او نجیب تلاش خیریه بنسټ ترمنځ د ګډې همکارۍ هوکړه لیک لاسلیک شو
د المپیک، بدني روزنې او ورزش ریاست اړوند د بډمنټون ملي فدراسیون او نجیب تلاش خیریه بنسټ ترمنځ د ٢٠٢٦ کال کابل بډمنټون اتلولي سیالیو د مالي ملاتړ ګډ هوکړه لیک لاسلیک شو، چې له مخې به یې یاد خیریه بنسټ په کابل کې د بډمنټون راتلونکو اتلولي سیالیو مالي ملاتړ پر غاړه لري.
د یاد هوکړه لیک د لاسلیک په مراسمو کې د المپیک، بدني روزنې او ورزش عمومي رئیس مولوي احمدالله وثیق، د یاد ریاست فني او میلکي مرستیال حافظ احمدجان ځداراڼ، د المپیکي چارو رئیس داد محمد پاینده اختري، د نجیب تلاش خیریه بنسټ رئیس نجیب الله تلاش او د ورزش ادارې رهبري غړو ګډون کړی و.
د غونډې پر مهال د ورزش ادارې عمومي رئیس مولوي احمدالله وثیق له نجیب تلاش خیریه بنسټ څخه مننه وکړه، چې تل یې په هېواد کې د ورزش د ودې په برخه کې د ورزشکارانو ملاتړ کړی دی.
ښاغلي وثیق همداراز زیاته کړه، چې افغانستان کې د پام وړ امنیت له امله د ورزش په ګډون په بېلابېلو برخو کې بېساري پرمختګونه شوي دي. افغان ورزشکارانو د ورزش ادارې په ملاتړ په نړۍوالو سیالیو کې د پام وړ لاسته راوړنې لرلي دي.
نوموړي زیاته کړه: ((خصوصي سکتور د ورزش د ودې په برخه مهم رول لري او موږ هڅه کوو، چې د ورزش د ودې لپاره د خصوصي سکتور او خیریه بنسټونو پام ځان ته را جلب کړو.))
په ورته وخت کې د یاد خیریه بنسټ اجرائیه رئیس نوید قادري خوښي څرګنده کړه، چې یو ځل بیا یې د خپل خیریه بنسټ له لارې د هېواد د ورزشکارانو د ملاتړ فُرصت موندلی دی. نوموړي همداراز له ورزشکارانو هیله وکړه، چې په نړۍوالو سیالیو کې هم ښې لوبې وکړي ترڅو د هېواد لپاره د پام وړ لاسته راوړنې ولري.
ټاکل شوې، چې د کابل ولایت د بډمنټون ټاکنیزې سیالۍ به د تنکیو ځوانانو، نویو ځوانانو او ځوانانو ورزشکارانو په عمري کټګوریو کې د روانې اپرېل میاشتې په ۲۳مه نېټه پیل شي.
