خوست کې د رسنیز کرکټ جام اووم پړاو لوبې پیل شوې
د خوست په مس عینک کرکټ لوبغالي کې د خوست رسنیز جام سیالیو اووم پړاو د رسمي پیل په موخه ځانکړي مراسم ترسره شول.
دغه سیالۍ چې هر کال د خوست ورزشي خبریالانو او شنونکو شورا په ابتکار او هڅو، د خوست سیمه ییزو رسنیو د خبریالانو ترمنځ ترسره کیږي، په سږني فصل کې به نهه لوبډلې د یو بل پر وړاندې لوبې ترسره کړي.
ددې سیالیو د پیل په تړاو په جوړو شویو مراسمو کې د خوست ورزشي امر عطاء الله کډوال، د شورا مشر او غړو ، خبریالانو، د رسنیو استازو او لوبغاړو ګډون درلود.
د خوست ورزشي خبریالانو او شنونکو شورا مشر ایوب خوښي څرګنده کړه چې یو ځل بیا فرصت برابر شوی تر څو د رسنیز جام لوبې پیل کړو.
ښاغلي ایوب له ټولو هغو کسانو او آدرسونو څخه مننه وکړه چې ددې لوبو مالي لاسنیوی یې کړی، د نوموړي په خبره د اسلامي امارت لوړ رتبه غړي انس حقاني، خوست ښاروالي او د ایوا ګروپ ددې سیالیو مالي ملاتړي دي، چې د دوی د مالي ملاتړ پرمټ به د رسنیو ترمنځ د کرکټ سږنی فصل په ښه ډول ترسره شي.
ددې لوبو موخه په خوست ولایت کې د غږیزو او تصویري رسنیو ترمنځ د همغږي رامنځ ته کول بلل شوي.
د خوست ورزشي آمر عطاءالله ګډوال د رسنیز کرکټ جام ترسره کیدل یو مهم ګام یاد کړ او د خوست ورزشي آمریت له ادرسه یې تر خپله وسه د هر اړخیزې همکارۍ ډاډ څرګند کړ.
د نن ورځې په مراسمو کې د ګټونکې لوبډلې له پاره غوره شوې ټراپي د لوبډلمشرانو په شتون کې نندارې ته وړاندې شوه.
د مراسمو له پای ته رسېدو وروسته د ازمون او ناز راډیو ګانو ترمنځ لوبه ترسره شوه، چې د ازمون لوبډلې په بریا پای ته ورسېده.
