خوست کې د بیس بال له ١٥٠ ورزشکارانو څخه د ټاکنیزې لوبډلې د ټاکلو په موخه ازموینه واخیستل شوه
د خوست ولایت د بدني روزنې او ورزش آمریت اړوند د هاکي فدراسیون د استازولۍ له لوري د ياد ولايت په اماني لوبغالي کې د بیس بال له ١٥٠ ورزشکارانو څخه د ټاکنیزو لوبډلو د ټاکلو په موخه ازموينه واخيستل شوه.
په دغه ازموینه کې له ١٥٠ تنو څخه ٣٥ تنه د خوست منتخبې لوبډلې او ١٥ تنه د نولس کلنو کم عمره لوبډلې ته د ټاکلو لپاره د ازموینې دویم پړاو ته لار ومونده.
ټاکل شوې، چې په لومړي پړاو کې بریالي لوبغاړي به د ازموینې په دویم پړاو کې ګډون وکړي او وروسته به بیا بریالي لوبغاړي د سويل ختيځ زون ټاکنیزې لوبډلې ته لار ومومي.
د یادونې وړ ده چې د زون په کچه ټاکل شوي لوبغاړي به د هېواد د زونونو په کچه د بیس بال ملي سیالیو کې ګډون وکړي.
