افغان غر ختونکي شریف احمد صفار په ایران کې د ګُرده آلمانها لوړه څوکه طی کړه
د هرات د غر ختنې فدراسیون استازی شریف احمد صفار په ایران کې د ګرده آلمانها ۴۸۵۰ متره لوړې څوکې ته ختلی دی.
ګرده آلمان ها په ایران کې د غر ختنې یوه له سختو او مسلکي لارو څخه ده، چې ۴۸۵۰ متره لوړوالی لري او په لومړي ځل د اشتیناور او گورتر په مشري د آلمان د غر ختنې ټیم له لوري په ۱۳۱۵ لمریز کال کې پرانیستل شوه.
ښاغلی شریف احمد صفار د هرات ولایت د بدني روزنې او ورزش ریاست اړوند د غر ختنې فدراسیون استازی او د پامیر غر ختنې کلپ سرپرست د هېواد یو له تجربه لرونکو غر ختونکو څخه دی چې د غر ختنې بېلابېلې دورې یې په ایران کې تېرې کړي دي.
همداراز ښاغلی صفار دویم افغان غر ختونکی دی چې، یادې لوړې څوکې ته خېژي. له دې مخکې علیرضا ولایتي هم د ۱۴۰۲ لمریز کال د وږي په ۴مه نېټه دغې لوړې څوکې ته ختلی و.
