په باميان کې د ۱۰۰ ورزشکارانو ترمنځ د رګبي دويم پړوا ټاکنيزې سيالۍ پيل شوې
د باميان ولايت د بدني روزنې او ورزش امريت په همکارۍ د رګبي ملي فدراسيون له لوري د ياد ولايت په مرکز کې د شپږو ولایتونو ( بلخ، غزني، کابل، کاپيسا، پروان او فارياب) د ۱۰۰ ورزشکارانو ترمنځ د رګبي دويم پړاو ټاکنيزې سيالۍ پيل شوې.
د دغو سياليو د پيل په مراسمو کې د باميانو ولايت والي مولوي عبدالله سرحدي، د ياد ولايت ورزشي آمر حافظ شفیق الرحمن رحيمي، د ورزش ادارې د ولايتونو د هماهنګۍ امريت غړي حبيب رسول مسعود، د سياليو د ترسره کولو امريت غړي استاد بصیر قيومي، د رګبي ملي فدراسيون فني معاون صفي الله احمدي، ورزشکارانو او د ورزش مينوالو ګډون کړی و.
مولوي عبدالله سرحدي د دغو سياليو د پيل په مراسمو کې وويل: " خوشحال يم، چې ستاسو سره مې په دغه ورزشي برنامه کې ګډون وکړ، اوس اسلامي نظام حاکم دی او زموږ دنده ده، چې ستاسو له ناموس، ځان، مال او عزت څخه ساتنه وکړو.
ده زياته کړه، ځوانان د ټولنې لپاره د الګو په څېر وي، په نړيوالو سياليو کې د نورو هيوادونو لپاره د اسلامي نظام يوه غوره الګو شئ، چې د نورې نړۍ ورزشکاران ستاسو له اخلاقو اغېزمن شي، له تاسو اخلاق زده کړي او د خپل هيواد وياړ وګرځئ.
د دغو سياليو لومړۍ لوبه د بلخ او کاپيسا ولايتونو د لوبډلو ترمنځ ترسره شوه، چې په پايله کې کاپيسا لوبډلې خپلې سیالې لوبډلې ته د ۱۰-۰ ګولونو په توپير ماتې ورکړه او لومړۍ بريا يې خپله کړه.
هېره دې نه وي چې دغو سياليو موخه د رګبي ملي لوبډلې لپاره د غوره لوبغاړو ټاکنه ده، څلور ورځې به دوام وکړي او په پايله کې به ۱۲ لوبغاړي د ملي لوبډلې لپاره وټاکل شي.
