اتحاد لوبډله په غور کې د تولک فوټبال خزاني جام سیالیو اتلولي وګټله
د غور ولایت د بدني روزنې او ورزش آمریت اړوند د فوټبال فدراسیون د استازولي له لوري د فوټبال خزاني جام سیالۍ چې ١٥ ورځې ورځې مخکې د نهو لوبډلو ترمنځ پیل شوې وې، د اتحاد لوبډلې په اتلولي پای ته ورسېدې.
د یادو سیالیو پایلوبه د اتحاد او سادات لوبډلو ترمنځ په ټاکلي وخت کې مساوي شوه؛ خو په پنالټیو کې اتحاد لوبډلې د ٤ پر ٢ ګولونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دا سیالۍ په تولک ولسوالۍ کې د ورزش د ودې په موخه ترسره شوې او په پای کې د ياد ولايت د ورزشي آمريت له لوري اتلې لوبډلې او غوره لوبغاړو ته مډالونه، ستاینلیکونه، توپ او ورزشي لباس او بوټان ورکړل شول.
