لوګر؛ د خوښۍ ولسوالۍ د ټېپ بال کرکټ سياليو اتلولي احمدشاه ابدالي لوبډلې خپله کړه
د لوګر ولايت په خوښۍ ولسوالۍ کې د ۲۴ لوبډلو ترمنځ د ټېپ بال کرکټ اختريزې سيالۍ د احمدشاه ابدالي لوبډلې په اتلولۍ پای ته ورسېدې.
د دغو سياليو پايلوبې ته احمدشاه ابدالي او سلېمان خېلو لوبډلو لار موندلې وه، چې په پايله کې ابدالي لوبډلې خپلې سيالې لوبډلې ته د لوبې په لومړۍ پاڼۍ کې ۱۵۱ منډې هدف کېښود، بل لوري ته سيالې سلېمان خېلو لوبډلې د ياد هدف په پوره کولو کې پاتې راغله او په ټاکلو ۱۵ اورونو کې يې د ټولو لوبغاړو په سوځېدو ۹۱ منډې جوړې کړې او ماتې يې وخوړه.
هېره دې نه وي چې د دغو سياليو د پايلوبې په مراسمو کې غوره لوبډلو او لوبغاړو ته، کپونه او ستاينليکونه ورکړل شول.
