کابل کې ۱۰۰ روزونکو او لوبڅارانو ته د ظرفيت لوړونې ښوونیز سمينار پيل شو
د المپيک، بدني روزنې او ورزش عمومي رياست اړوند د کاراټې ملي فدراسيون له لوري د هېواد له ۲۴ ولايتونو څخه ۱۰۰ روزونکو، مسولينو او لوبڅارانو ته د ورزشي مديريت، لوبڅارۍ او روزنې لومړی پړاو، پينځه ورځنی ښوونیز سمينار د المپيک ملي کمېټې د غونډو په تالار کې پيل شو.
په دې سمينار کې به د دې فدراسيون د مسوولينو سربېره د هېواد ورزش ادارې د دعوت او ارشاد رياست او د بېلابېلو امريتونو د مسوولينو له لوري، ښوونيز، د روزنې او لوبڅارۍ اصول، د لومړنۍ مرستې اصول، د فني او مسلکي برخې اړوند بېلابېل موضوعات او د ورزش اړوند اصلاحي موضوعات په نظري او عملي بڼه تشريح شي.
د دې سمينار په لومړۍ ورځ د هېواد د ورزش ادارې د دعوت او ارشاد رياست رئيس مفتي داد محمد بريال عطايي له ټولو روزونکو او لوبڅارانو څخه و غوښتل، چې د سياليو او تمرين په وخت کې ټول شرعي اصول مراعات کړي او تل قضاوت په انصاف سره ترسره کړي او حق حقدار ته وسپاري.
دغه راز نوموړي، له ټولو روزونکو او مسوولينو څخه غوښتنه وکړه، چې خپل ورزشکاران په اسلامي روحيې سمبال وروزي.
د ويلو ده، چې دغه سمينار، د هېواد د ورزش ادارې د د عوت او ارشاد رئیس داد محمد بريال عطايي، د دې فدراسيون رئیس روح الله معروف، د ياد فدراسيون روزونکو، لوبڅارانو او مسوولينو په شتون کې پيل شو، چې پينځه ورځې به دوام وکړي.
