تخار؛ رستاق ولسوالۍ کې ورزشي جشنوارې پای ته ورسېدې
د تخار ولایت دبدني روزنې او ورزش امریت اړوند د رستاق ولسوالۍ ورزشي مدیریت له لوري د یاد ولایت په رستاق ولسوالۍ کې د پسرلني موسم په موخه د وزلوبې او سیمه ییزې غېږنیونې ورزشي جشنوارې سیالۍ پای ته ورسېدې.
په دغو سیالیو کې ۱۵۰ چاپندازانو ګډون کړی وو، چې په پایله کې غلام خدایي، غبدالرشید، سمیع الله، ذبیح الله، شمس الله، او ګل محمد تر نورو ښه وځلېدل او د ډالیو ګټونکي شول.
همدارنګه د سیمه ییزې غېږنیونې په سیالیو کې ۱۲۰ تنو ورزشکارانو ګډون کړی وو، چې په پایله کې ۶۰ تنو ورزشکارانو خپلو سیالانو په ماتې ورکولو سره بریاوې خپلې کړې او د ډالیو ګټونکي شول.
د یادونې وړ ده، چې دغه سیمه ییزې جشنوارې سیالۍ د یاد ولایت د رستاق په دشت قوشخانه سیمه کې له بېلا بېلو ولایتونو د لس زرو کسانو په شتون کې په پوره امن کې ترسره شوې، چې درې ورځې یې دوام وکړ.
