هلمند؛ په مرکز لښکرګاه ښار کې د ۱۰ لوبډلو ترمنځ د ټېپ بال کرېکټ سيالۍ پيل شوې
د هلمند ولایت د بدني روزنې او ورزش امریت له لوري د ياد ولايت د مرکز لښکرګاه ښار په درېيمه حوزه بولان سيمه کې د ۱۰ لوبډلو ترمنځ د ټېپ بال کرېکټ سيالۍ د ملاخيل لوبډلې په بریا سره پيل شوې.
د دغو سياليو لومړۍ لوبه د ملاخیل او د فولاد لوبډلو ترمنځ ترسره شوه، ملاخیل لوبډلې د پچې په ګټلو سره د توپ وهنې پرېکړه وکړه، چې په ټاکلو ۱۲ اورونو کې مقابلې لوبډلې ته د ۲۳۵ منډو هدف وټاکه. په ځواب کې فولاد لوبډلې د ټولو لوبغاړو په سوځېدو سره ۲۱۳ منډې جوړې کړې او لوبه يې د ۲۲ منډو په توپير سره وبايلله.
د يادو سياليو موخه ورزش ته د ځوانانو هڅول دي، چې درې اوونۍ به دوام وکړي.
