د المپيک بدني روزنې او ورزش عمومي رييس د نيمروز ولايت له ورزشي مسولينو سره وکتل
د المپيک بدني روزنې او ورزش عمومي رييس مولوي احمدالله وثيق او ورسره مل پلاوي نيمروز ولايت ته د خپل سفر په لړ کې د ياد ولايت د ورزشي مسوولينو او د فدراسيونونو له استازو سره وکتل او په دغه ولايت کې يې د ورزش د ودې او ستونزو د حل په موخه خبرې وکړې.
په پيل کې د المپيک بدني روزنې او ورزش عمومي رييس مولوي احمد الله وثيق د ياد ولايت په کچه د ورزش په برخه کې د ورزشي مسولينو او استازو غوښتنې، ستونزې او لاسته راوړنې واورېدې او د هيواد په کچه يې د ورزشي لاسته راوړنو په برخه کې د نيمروز ولايت ورزشکاران برخمن وګڼل.
ښاغلي وثیق د ياد ولايت د ورزشي مسولينو او فدراسيونونو له استازو وغوښتل چې په ياد ولايت کې د ورزش د ودې او پرمختګ لپاره لا زياتې هڅې وکړي، قوي همغږي ولري او د ورزش په برخه کې د خپل ولايت نوم د تل په څېر ژوندی او لوړ وساتي. نوموړي دغه راز دوی ته ډاډ ورکړ چې د ورزش اداره يې تر خپل توانه تر څنګ ولاړه ده او له دوی سره به خپلې همکارۍ ژوندۍ ساتي او له دوی سره يې ژمنه وکړه، چې د دغه ولايت د رزمي ورزشونو لپاره به رېنګ هم په نيږدې راتلونکې که وسپاري تر څو د ورزشکارانو ستونزې نورې هم حل شي.
د دې ترڅنګ ښاغلي مولوي احمد الله وثيق، د ياد ولايت له ورزشي اماکنو هم ليدنه وکړه او د دغه ولايت له ورزشي مسولينو يې وغوښتل، چې د ساتنې په برخه کې يې د تېر په څېر دقت وکړي او ښه ساتنه يې وکړي.
