د ورزش ادارې عمومي رئیس مولوي احمد الله وثیق د هرات ولایت د فدراسیونونو له رئیسانو سره ولیدل
د المپیک کمېټې، بدني روزنې او ورزش عمومي رئیس مولوي احمد الله وثیق او ورسره مله پلاوي حافظ احمد جان ځدراڼ د یاد ریاست فني او مسلکي مرستیال، داد محمد پاینده اختري د المپیکي چارو رئیس، د فني او مسلکي ریاست سرپرست حمید الله ساپي هرات ولایت ته د سفر په جریان د دې ولایت د مختلفو فدراسیونونو له استازو او د نوموړي ولایت د ورزش ریاست له کارمندانو سره وکتل.
په لومړي قدم کې د هرات ولایت د ورزشي مسولینو او د فدراسینونو د استازو له خوا د ورزش ادارې رهبري ته ښه راغلاست وویل شو او بیا یې د هرات ولایت ورزشي فدراسیونونه او تشکیلات تشریح کړل او هم یې د نوموړي ولایت د ورزشکارانو لاسته راوړنې بیان کړې.
ښاغلي مولوي احمد الله وثیق په خپله وینا کې د هرات ولایت د مختلفو فدراسیونونو ورزشي لاسته راوړنې د پاموړ وبللې په خپلو خبرو کې یې وویل: " هرات د هیواد په هغو ولایتونو کې راځي، چې ورزش پکې ډېر او ورزشکارانو یې تل هیواد ته ویاړونه راوړي دي. موږ مخکې هم د هرات ولایت ورزش ته ځانګړې پاملرنه کړې ده او په اینده کې هم کوشش کوو، چې د تاسو ټولو غوښتنو ته رسیده ګي وکړو."
د غونډې په پای کې د هرات ولایت د ورزشي مسولینو نظرونه هم واورېدل شول او غوښتنو ته یې د رسیده ګۍ ژمنه وشوه.
