ننګرهار؛ خېوې ولسوالۍ کې د شپږو لوبډلو ترمنځ د ټېپ بال کرکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرکټ فدراسیون د استازولي له لوري د ياد ولايت په خېوې ولسوالۍ کې د شپږو لوبډلو ترمنځ د ټېپ بال کرکټ سیالۍ د سید جمال الدین افغان لوبډلې په اتلولي پای ته ورسېدې.
په دغو سیالیو کې خیوې مرکزي، سورج، پاچاهۍ قلعه، سید جمال الدین، سرجل سټار او بډیالۍ لوبډلو ګډون کړی و، چې پای لوبه یې د سید جمال الدین افغان او سرجل لوبډلو ترمنځ ترسره شوه. د لوبې پچه د سرجل لوبډلې وګټلو او لومړی یې د توپ وهنې پرېکړه وکړه، چې په ټاکلو لس اورونو کې یې د خپلو ۵ لوبغاړو په له لاسه ورکولو سره خپلې سیالې لوبډلې ته د ۱۴۵ منډو هدف وټاکه. د سید جمال الدین افغان لوبډلې ټاکلی هدف د خپلو ٤ لوبغاړو په له لاسه ورکولو سره پوره کړ او په شپږو ویکټو يې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې چې لس ورځې یې دوام وکړ.
