تخار؛ خواجه غار ولسوالۍ کې د والیبال سیالۍ د رستاق ولسوالۍ لوبډلې په اتلولۍ پای ته ورسېدې
د تخار ولایت د بدني روزنې او ورزش امریت اړوند د والیبال ملي فدارسیون د استازولۍ له لوري په خواجه غار ولسوالۍ کې د یاد ولایت د ۱۸ ولسوالیو او د کندز ولایت د دوو لوبډلو ترمنځ د یووالي جام په نوم د والیبال حذفي سیالۍ، چې دوې ورځې وړاندې پيل شوې د رستاق لوبډلې په اتلولۍ پای ته ورسېدې.
د دغو سیالیو په پایلوبه کې د رستاق ولسوالۍ لوبډلې خپلې سیالې د تخار ولایت معارف ریاست لوبډلې ته د ۳/۰ میدانونو په توپير ماتې ورکړه او اتلولي یې خپله کړه.
د یادو سیالیو موخه د والیبال ورزش ته وده ورکول او د ورزشکارانو ترمنځ یووالی رامنځته کول و.
د سیالیو په پای کې د تخار ولایت ورزشي امریت له لوري غوره لوبډلې ته د اتلولۍ جام او غوره لوبغاړو ته ډول ډول ورزشي ډالۍ ورکړل شوې.
