هلمند؛ حاجي درويشان لوبډلې د اختريز جام په نوم د فوټبال سياليو اتلولي وگټله
د هلمند ولايت د بدني روزنې او سپورټ امريت اړوند د فوټبال فدراسيون د استازولۍ له لوري د گرمسېر ولسوالۍ په کوچني درويشان حوزه کې د څلورو لوبډلو ترمنځ د اختريز جام په نوم د فوټبال ناک اوټ سيالۍ د حاجي درويشان لوبډلې په اتلولۍ پای ته ورسېدې.
د يادو سياليو په پايلوبه کې حاجي درويشان لوبډلې سيالې وطن لوبډلې ته د ۰/۲ گولونو په توپير ماتې ورکړه او اتلولي يې خپله کړه.
دغه سیالۍ، چې يوه ورځ يې دوام وکړ، په پای کې لومړي او دوهم مقام گټونکو لوبډلو ته کپونه او غوره لوبغاړو ته بېلابېلې چمتو شوې ډالۍ ورکړل شوې.
