کابل؛ د نېکمرغه لوی اختر په مناسبت د پنځو ولایتونو ۱۵۰ ورزشکارانو ترمنځ د سوک وهنې سیالۍ ترسره شوې
د المپیک، بدني روزنې او ورزش لوی ریاست اړوند د سوک وهنې ملي فدراسیون له لوري د یاد فدراسیون په مرکزي جمناریوم کې له پنځو ولایتونو د ۱۵۰ ورزشکارانو ترمنځ د لوی اختر نمانځلو په موخه د سوک وهنې سیالۍ ترسره شوې.
دغو سیالیو ته د بدني روزنې او ورزش لوی ریاست فني او مسلکي معاون حافظ احمدجان ځدراڼ، د یاد ریاست ورزشي مشاور قاری حیات الله رحماني، د سوک وهنې ملي فدراسیون رییس قدیر سلطاني، ورزشي مسوولین او ورزشکاران راغلي وو.
د بدني روزنې او ورزش لوی ریاست فني او مسلکي معاون حافظ احمدجان ځدراڼ د دغو سیالیو په اړوند وویل: د هېواد ورزش ادارې د هېواد په ټولو ولایتونو کې د اختر نمانځلو په موخه دا ډول سیالۍ برابرې کړې دي؛ ترڅو په اخترونو کې هم زموږ ورزشکاران او هېوادوال له ورزش څخه مستفید شي او امید لرم، چې د هېوادوالو د خوشحالۍ وړ به وګرځي او دوی ته به یوه سالمه تفریح برابره شي.
دغه سیالۍ د تنکیو ځوانانو، نويو ځوانانو، ځوانانو او لویو ورزشکارانو په عمري کټګورۍ کې د کابل، ننګرهار، کونړ، لوګر او د خوست ولایتونو ورزشکارانو ترمنځ ترسره شوې، چې په پایله کې د کابل ولایت ورزشکارانو د ۱۲۰ امتیازونو په ترلاسه کولو لومړی، ننګرهار ورزشکارانو د ۶۰ امتیازونو په ترلاسه کولو دویم او د لوګر ولایت ورزشکارانو د ۱۸ امتیازونو په ترلاسه کولو درېیم مقام ترلاسه کړ.
هېره دې نه وي دغو سیالیو یو ورځ دوام وکړ او موخه یې د لوی اختر نمانځل و.
د سیالیو په پای کې غوره لوبډلې ته کپ او غوره لوبغاړو ته د اتلولۍ حکم او مډالونه ورکړل شوه.
