ننگرهار؛ پاچا سټار لوبډلې د امن پسرلي په نوم د ټېپ بال کرکټ سياليو اتلولي وگټله
د ننگرهار د بدني روزنې او ورزش رياست اړوند د شينوارو شپږگونو ولسواليو ورزشي مديريت په همغږۍ د نازيانو ولسوالۍ په ژۍ سر لوبغالي کې د ۱۴ لوبډلو ترمنځ د امن پسرلي په نوم د ټېپ بال کرکټ سيالۍ د پاچا سټار لوبډلې په اتلولۍ پای ته ورسېدې.
د يادو سياليو پايلوبه لوبه د پاچا سټار او مورچل بازانو لوبډلو ترمنځ ترسره شوه، پاچا سټار لوبډلې د لوبې پچې په گټلو سره په ټاکلو ۱۲ اورونو کې د څلورو لوبغاړو په سوځېدو سره سیالې لوبډلې ته د ۲۲۰ منډو هدف کېښود، مورچل بازانو لوبډلې ياد هدف ترلاسه نه کړ او د ۴۵ منډو په توپير ماته ومنله.
دغه سیالۍ چې شاوخوا ۳۶ ورځې يې دوام وکړ، په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
