د ورزش ادارې عمومي رئيس مولوي احمد الله وثيق د واليبال له ټپي ورزشکار مزمل بدر څخه ليدنه وکړه
د المپيک ملي کمېټې او سپورټ عمومي رئيس مولوي احمد الله وثيق د واليبال له ټپي ورزشکار مزمل بدر، چې دوې ورځې وړاندې په يوه ترافيکي پېښه کې ټپي شوی و، ليدنه وکړه. په دې ليدنه کې د المپيک ملي کمېټې مرستيال باور خان هوتک، د واليبال فدراسيون سکرتر جنرال حاجي محمد ناصر نوري او د ورزش ادارې نورو مسولينو هم شتون درلود.
د يادې ليدنې په ترڅ کې ښاغلي وثيق په ۴۰۰ کسيز روغتون کې له اړوند ډاکټرانو سره وليدل او له هغوی څخه يې د ناروغ د وضعيت پر اړه معلومات واورېدل. ډاکټرانو د ناروغ وضعيت تر دې دمه د ډاډ وړ وباله او په خبره يې په راتلونکو څو ورځو کې به د ناروغ حالت نور هم روښانه شي. ښاغلي احمد الله وثيق او ورسره مله پلاوي د مزمل بدر د کورنۍ له غړو سره هم وليدل، هغوی ته يې ډاډ ورکړ او د هر ډول ممکنې مرستې ژمنه يې ورسره وکړه.
مزمل بدر د واليبال پياوړی لوبغاړی دی، چې د سرې مياشتې په لوبډله کې غړيتوب لري.بايد يادونه وکړو، چې د ورزش ادارې او واليبال فدراسيون د رهبري له خوا د مزمل بدر د کورنۍ له غړو سره يوه اندازه نغدي مرسته هم وشوه.
