لوگر؛ پل علم ښار کې د ۳۶ لوبډلو ترمنځ د واليبال سيالۍ پای ته ورسېدې
د لوگر ولايت د بدني روزنې او سپورټ امريت اړوند د واليبال فدراسيون د استازولۍ له لوري د پل علم ښار په حاجي گلون کلي کې د مرکز او ولسواليو په کچه د ۳۶ لوبډلو ترمنځ د " آزادۍ جام" په نوم د واليبال سيالۍ د څرخ ولسوالۍ د قاري محمود لوبډلې په اتلولۍ پای ته ورسېدې.
د يادو سياليو پايلوبه د څرخ ولسوالۍ د قاري محمود او د ميدان ښار د انجينر جاويد عزيزي لوبډلو ترمنځ ترسره شوه، چې په پايله کې د څرخ ولسوالۍ د قاري محمود لوبډلې خپلې سيالې لوبډلې ته د ۱/۳ ميدانونو په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د ځوانانو ترمنځ يووالی و، چې شاوخوا يوه مياشت يې دوام وکړ او په پای کې د ياد ولايت د ورزش امريت له لوري اتلې لوبډلې ته يو پسه او غوره لوبغاړو ته مډالونه، کپونه او ستاينليکونه ورکړل شول.
