زابل؛ مرکز قلات ښار کې د لسو لوبډلو ترمنځ د ټېپ بال کرکټ سیالۍ پای ته ورسېدې
د زابل ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري ، د لوبغاړو او د یاد ولایت د ورزشي آمریت په مالي ملاتړ د یاد ولایت مرکز قلات ښار کې د لسو لوبډلو ترمنځ د ټېپ بال کرکټ سیالۍ د باباګک کلي لوبډلې په اتلولي پای ته ورسېدې.
د دغو سیاليو پایلوبه د باباګک کلي او سینک کلي لوبډلو ترمنځ ترسره شوه، چې د سینک کلي لوبډلې په ټاکلو ۱۲ اورونو کې د شپږو لوبغاړو په زیان سره خپلې سیالې لوبډلې ته د ۱۳۷ منډو هدف وټاکه، چې د باباګک لوبډلې یاد هدف د څلورو لوبغاړو په له لاسه ورکولو سره د لوبې په نهم اور کې پوره کړ او اتلولي یې په خپل نوم کړه.
یادو سیالیو لس ورځې دوام وکړ، چې په پای کې د زابل ولایت د ورزشي آمریت له لوري غوره لوبغاړو ته ورزشي توکي او ستاینلیکونه ورکړل شول.
