بادغیس؛ امید فرستان لوبډلې د فوټسال سیالیو اتلولي وګټله
د بادغیس ولایت د بدني روزنې او ورزش امریت اړوند د فوټبال فدراسیون د استازولۍ له لوري د اتو لوبډلو ترمنځ د فوټسال سیالۍ، چې ۱۵ ورځې وړاندې د یاد ولایت په اریانا جمنازیوم کې پیل شوې وې د امید فرستان لوبډلې په اتلولۍ پای ته ورسېدې.
د دغو سیالیو پایلوبه د امید فرستان او تک ستاره لوبډلو ترمنځ ترسره، چې په پایله کې د امید فرستان لوبډلې خپلې سیالې لوبډلې ته د ۴/۳ ګولونو په توپیر ماتې ورکړه او اتلولي یې خپله کړه.
د یادو سیالیو په پای کې د ورزش مسوولینو له لوري غوره لوبډلې ته د اتلولۍ کپ او غوره لوبغاړو ته ستاینلیکونه ورکړل شول.
