ننګرهار؛ سپين غر ولسوالۍ کې د ټېپ بال کرکټ سیالۍ پیل شوې
د ننګرهار ولایت د بدني روزنې او ورزش ریاست اړوند د شينوارو ولسواليو ورزشي مديريت له لوري د سپين غر ولسوالۍ سرحدي لوبغالي کې د ۱۶ لوبډلو ترمنځ د ټېپ بال کرکټ سيالۍ پيل شوې.
د یادو سیالیو لومړۍ لوبه د "سپين غر شاهين " او "اسد خېلو سټار" لوبډلو تر منځ ترسره شوه، چې په پایله کې د سپين غر شاهين لوبډلې پۀ ټاکلو لسو اورونو کې د څلورو لوبغاړو له لاسه ورکولو سره د ۱۷۸ منډو هدف وټاکه، په مقابل کې د اسدخېلو سټار لوبډلې د شپږو لوبغاړو په سوځېدو سره یوازې ۱۱۰ منډې ترلاسه کړې او سیالي یې د ۶۷ منډو په په توپیر د سپين غر شاهين لوبډلې ته وبایلله.
هېره دې نه وي، چې یادې سیالۍ به یوه میاشت دوام وکړي او د ترسره کېدو موخه يې د ملکي او نظامي ادارو مسؤلینو له لورې ولس ته ښه خدمت یاد شوی.
