کابل؛ د ۲۰۰ ورزشکارانو په ګډون د لومړی پړاو یو ورځنۍ سیالۍ وشوې
د بدني روزنې او ورزش عمومي ریاست له لوري د پنځو ولایتونو د ۲۰۰ ورزشکارانو ترمنځ د سولې او امن په نوم د پارکور ملي فدراسیون لومړی پړاو سیالې د کابل ولایت په کوربتوب ترسره شوې.
دغه سیالۍ چې یوه ورځ يې دوام وکړ د کابل، ننګرهار، پکتیا، کاپیسا او خوست ولایتونو لوبغاړو ګډون کړی وو، چې د تنکیو ځوانانو او ځوانانو په کټګوریو او رانینګ او موانع عبور برخو کې ترسره شوې.
د دغو سیالیو لیدلو ته د بدني روزنې او ورزش عمومي ریاست ورزشي مشاور قاري حیات الله رحماني، د المپیک ملې کمېټې اجرایه رییس داد محمد پاینده اختري، د بدني روزنې او ورزش ریاست د دعوت او ارشاد رییس مولوي داد محمد بریال عطایي، پارکور ملي فدراسیون مشرتابه، ولایتونو استازو، ورزشکارنو او زیات شمېر مینوال راغلي وو.
د بدني روزنې او ورزش عمومي ریاست ورزشي مشاور قاري حیات الله رحماني ټولو ګډونوالو ته ښه راغلاست وویلې او زیاته یې کړه: خوښ او خوشحاله یم چې په ټول هېواد کې سوله او امن دی او لوبغاړي کولای شي په ډاډه زړه له ولایتونو نه مرکز او نورو ولایتونو ته د سیالیو لپاره سفرونه وکړي او په پای کې یې ورزشکارانو د هر ډول مرستې او ملاتړ ډاډ ورکړ.
د یادو سیالیو د ترسره کېدو موخه د پارکور ورزش ته وده ورکول او غوره لوبغاړي پېژندل وو. په پای کې غوره لوبغاړو ته ستاینلیکونه هم ورکړل شول.
