هلمند؛ آريانا لوبډلې د استقلال په نوم د ټېب بال کرکټ سياليو اتلولي وگټله
د هلمند ولايت د بدني روزنې او سپورټ آمريت اړوند، د گرشک ولسوالۍ سپورټي مديريت له لوري په گنج لوبغالي کې د لسو لوبډلو تر منځ د استقلال په نوم سيالۍ د آريانا لوبډلې په اتلولۍ پای ته ورسېدې.
د يادو سياليو پايلوبه د اريانا او گرشک زلميانو لوبډلو تر منځ ترسره شوه، د لوبې پچه گرشک زلميانو لوبډلې وگټله او لومړی يې د توپ وهنې پرېکړه وکړه، چې په ټاکلو ۱۵ اورونو کې سيالې لوبډلې ته د ۱۵۳ منډو هدف وټاکو، آريانا لوبډلې ياد هدف په ۱۴ اورونو کې ترلاسه کړ او د يادو سياليو اتلولي يې په خپل نوم کړه.
دغه سيالۍ، چې درې اوونۍ يې دوام وکړ، موخه يې د ځوانانو تر منځ سالمه تفريح وه. په پای کې لومړي او دويم مقام گټونکو لوبډلو ته کپونه او ستاينليکونه ورکړل شول.
