غزني؛ په ګیلان ولسوالۍ کې د فوټبال سیالۍ د شاهین افغان لوبډلې په اتلولۍ پای ته ورسېدې
د غزني ولایت د بدني روزې او سپورټ آمریت په همغږۍ د ۱۶ لوبډلو ترمنځ د فوټبال سیالۍ، چې د یاد ولایت د ګیلان ولسوالۍ په جنده بازار کې درې اوونۍ مخکې پیل شوې وې د شاهین افغان لوبډلې په اتلولۍ پای ته ورسېدې.
د دې سیالیو پایلوبه د شاهین افغان او هېواد باران لوبډلو ترمنځ ترسره شوه، چې په پایله کې شاهین افغان لوبډلې وکولای شول خپلې سیالې لوبډلې ته د ۳/۰ ګولونو په توپیر ماتې ورکړي او اتلولي په خپل نوم کړي.
د یادو سیالیو ترسره کېدو موخه د فوټبال ورزش ته وده ورکول او د ګیلان ولسوالۍ منتخبې لوبډلې ته د غوره ورزشکارانو پیداکول ښودل شوي.
