کونړ؛ د کرکټ ټېپ بال سيالۍ د آسپل خصوصي ښوونځي لوبډلې په ګټه پاى ته ورسېدې
د کونړ ولايت بدني روزنې او ورزش امريت په مالي همکارۍ د مرکز اسعد اباد ښار په څاګي کې د کرکټ ټېپ بال سيالۍ، چې ١٥ ورځې وړاندې د ٩ لوبډلو ترمنځ پيل شوې وې، د اسپل خصوصي ښوونځي لوبډلې په ګټه پاى ته ورسېدې.
د دغو سیالیو په پايلوبه کې د اسپل خصوصي ښوونځي او څاګي هجران لوبډلې سره ولوبېدلې، چې څاګي هجران لوبډلې د لوبې پچه وګټله او لومړى يې توپوهنه وکړه، چې په ٨ اورونو کې يې د اوو ويکټو په زيان د اسپل ښوونځي لوبډلې ته د ٨٠ منډو هدف ورکړ.
په مقابل کې د اسپل خصوصي ښوونځي لوبډلې ورکړل شوى هدف د درېيو لوبغاړو په سوځېدو سره د لوبې په شپږم اور کې پوره کړ او لوبه يې د ٧ ويکټو په توپیر وګټله.
په دغو سياليو کې حسين الله د غوره لوبغاړي جایزه ترلاسه کړله.
د سیالیو هدف د کونړ ولایت لپاره د کرکټ ټېپ بال منتخبې لوبډلې پر جوړولو سربېره په مرکز او ولسواليو کې د ټېپ بال رشتې منظمول او وده ورکول دي.
په پاى کې د ورزش امريت له لوري غوره لوبغاړي او د لوبو خدمت کوونکي په ورزشي ډاليو او ستاينليکونو ونازول شول.
