د بدن ښکلا درې تنه ورزشکاران جنوبي کوریا ته په نړیوالو سیالیو کې د ګډون لپاره ولاړل
د هیواد د بدن ښکلا د فدراسیون درې تنه ورزشکاران جنوبي کوریا ته په نړیوالو سیالیو کې د ګډون په موخه د المپیک ملي کمېټې او سپورټ عمومي ریاست له رئیس مولوي احمد الله وثیق سره تر لیدنې وروسته د نوموړیو سیالیو په لور روان شول .
د مخې ښې په دې لیدنه کې د المپیک ملي کمېټې مرستیال او د بدن ښکلا فدراسیون رئيس باور خان هوتک هم موجود.
د بدن ښکلا او فزیکي ورزشونو څوارلسم پړاو نړیوالې سیالۍ د جنوبي کوریا د ګانګوان ایالت په ونجو ښار کې د نړۍ د مختلفو هیوادونو د شپږ سوه ورزشکارانو په ګډون د نوامبر میاشتې پر ۶ مه پیلیږي او تر ۱۲ مې نېټې پورې دوام کوي.
له افغانستان څخه په دې سیالیو کې درې تنه ورزشکاران: علي رضا اساهي، زلمی شکوري او محمد ایوب اعظمي ګډون کوي، همدارنګه له نوموړې ورزشي ډلې سره استاذ نورالهدا شېرزاد د بدن ښکلا د نړیوالو سیالیو داور هم ملتیا کوي.
