سمنګان؛ عقابان شيخه لوبډلې د دره صوف د واليبال سياليو اتلولي وګټله
د سمنګان ولايت د بدني روزنې او ورزش امريت په همغږۍ د واليبال فدراسيون استازولۍ له لوري د ٣٢ لوبډلو ترمنځ د واليبال سيالۍ، چې يوه مياشت وړاندې د دې ولايت د دره صوف ولسوالۍ کرمک کلي په ورزشي ميدان کې پيل شوې وې د عقابان شيخه لوبډلې په ګټه پاى ته ورسېدې.
د دې سياليو په پايلوبه کې د عقابان شيخه او امپراطور شمال لوبډلې سره ولوبېدې، چې د عقابان شيخه لوبډلې د ١٤- ٣ په پايلې سره سیالې لوبډلې ته ماتې ورکړه، د دې سياليو اتلولي یې وګټله او د شمال امپراطور لوبډله په دويم مقام کې پاتې شوه.
په پاى کې د کرمک کلي اوسېدونکي له لوري اتلې لوبډلې ته يوه غوا او د دويم مقام لوبډلې ته کپ او شپږ زره افغانۍ ورکړل شوې.
د دې سياليو موخه د ورزش ته د ځوانانو هڅول او د ورزشکارانو ترمنځ د يوبل منلو فضا رامنځته کول دي.
