په غزني کې د محلي ـ دودیزو سیالیو د ودې په موخه د نېزې وهنې سیالۍ ترسره شوې

په غزني ولایت کې د محلي- دودیزو سیالیو د ودې او پرمختګ په موخه د غزني مرکز او څلور ولسوالیو د ۳۶ لوبډلو ترمنځ د نېزې وهنې سیالۍ ترسره شوې.
په دغو سیالیو کې د اندړو، ده یک، ګيرو او واغظ ولسوالیو لوبډلې د غزني مرکز زرګر دښتې په میدان کې د یوې ورځې لپاره سره ولوبېدلې.
په دې ورزشي پروګرام کې د غزني د ورزش امر حاجي بلال او ګڼ شمېر نندارچیانو برخه لرله.
د یادو سیالیو په پایله کې د ګیرو ولسوالۍ لوبډلې لومړی، د انډړو ولسوالۍ لوبډلې دویم او د ده یک ولسوالۍ لوبډلې درېیم مقام ترلاسه کړ.