تخار؛ د سپورت ریاست رهبري پلاوي ته د ښه راغلاست په توګه د کورش سیالۍترسره شوې
تخار ولایت ته د هېواد د سپورت ادارې د رهبري پلاوي د ښه راغلاست په توګه د تخار له مرکز او ولسوالیو څخه د ۵۵-۹۵ کیلو وزنونو د ۸۵ تنو ورزشکارانو ترمنځ د کورش او تاجکستاني غېږنیونې په زړه پورې سیالۍ ترسره شوې.
د دې سیالیو په څنډه کې د هېواد د سپورت ریاست رهبري پلاوي د تخار ولایت د ورزش ادارې له مسؤولینو سره هم ناسته وکړه او د ورزش په برخه کې هلته شته ستونزې یې واوریدې.
د تخار د ورزش مسؤولینو د ورزشي امکاناتو او تجربه لرونکو ترینرانو نه شتون، ورزشکارانو ته د عصریې په وخت نه ورکړه هغه ستونزې وبللې چې دوی د اوس لپاره ورسره مخ دي.
په پاى کې د ورزش رياست مسوولينو د دغو ستونزو د حل ژمنه وکړه او ويې ويل چې د بدني روزنې او ورزش عمومي رياست به د ورزشکارانو پر وړاندې د شته ننګونو د هواري لپاره له هېڅ ډول اقدام څخه درېغ ونکړي.
د يادونې وړ ده چې د سياليو په پاى کې عبدالستار، عبدالله او قاري شکېب په بېلابېلو وزنونو کې د سرو زرو مډالونه وګټل او د بدني روزنې رياست له لوري په مډال، ستاينليکونو او ورزشي جامو وستايل شول.
