ننګرهار؛ په پچيراګام ولسوالۍ کې د ۱۶ لوبډلو ترمنځ د واليبال سيالۍ پيل شوې
د ننګرهار ولایت د بدني روزنې او سپورت ریاست له لوري د ننګرهار ولایت په پچیراګام ولسوالۍ کې د ننګرهار والیبال کپ په نوم د ۱۶ لوبډلو ترمنځ د والیبال سیالۍ پیل شوې.
د دغو سیالیو د پرانیستلو په مراسمو کې د ننګرهار ولایت د سپورټ مسوولینو، د پچیراګام ولسوالۍ مسوولینو، امنیتي منسوبینو، قومي مشرانو او د والیبال مینوالو برخه اخیستې وه.
په دغو سیالیو کې د خراسان، ګردي غوث، بهسودو، خوګیاڼو، کوټ، سرخرود، اتحاد، دره نور، چپرهار، شینوارو، رودات، بډیالي، هډې فارم، پچیراګام، ننګرهار ښاروالۍ او شګې لوبډلې ګډون لري.
د ننګرهار والیبال کپ په نوم سياليو په لومړۍ لوبه کې د بهسودو او خوګياڼو لوبډلو له يو بل سره لوبه وکړه چې په پایله کې يې د خوګياڼو لوبډلې د ٠-٢ په توپير سره بریا خپله کړه.
د يادونې وړ ده چې د دې ټورنمنټ په دوام به سبا هم دوه لوبې ترسره شي، په لومړۍ لوبه کې به د سرخرود او کوت لوبډلې او په دویمه لوبه کې به د اتحاد او خیوې لوبډلې له یو بل سره مخامخ شي او په پام کې دغه سیالۍ څلور ورځې دوام وکړي.
