وحدت لوبډلې د سمنګان فوټبال دوستانه سياليو اتلولي خپله کړه
د سمنګان ولایت د دره صوف بالا او دره صوف پاين ولسوالیو د دوو لوبډلو ترمنځ د فوټبال دوستانه لوبه چې تېره ورځ د دې ولايت په ورزشي لوبغالي ترسره شوه د دره صوف پاين وحدت لوبډلې په ګټه پاى ته ورسېده.
په دغه ورزشي پروګرام کې د یاد ولایت پر ورزشي مسوولینو سربېره د ولایتي ادارې مسؤلینو هم ګډون درلود او لوبډلې يې وهڅولې او ملاتړ يې ترې وکړ.
د دغو سياليو په پايله کې وحدت لوبډلې د ٥-٠ ګولونو په توپیر اميد فردا لوبډلې ته ماتې ورکړه او د دې سياليو اتلولي يې خپله کړه.
د دې سياليو موخه د ورزشکارانو ترمنځ د تجربو شريکول او دَ ځوانانو ترمنځ د يوبل منل دي.
په پاى کې ګټونکې لوبډلې ته کپ او غوره ورزشکارانو ته مډالونه ورکړل شول.
