د افغانستان د کرکټ له ۱۹کلنو کم عمرې ملي لوبډلې د درې اړخیزې لوبلړۍ پایلوبې ته لاره ومونده
د افغانستان د کرکټ له نولس کلنو کم عمرې ملي لوبډلې د بشیر افغان د غوره توپ اچوونې او د نعمان شاه د غوره توپوهنې په مټ د درې اړخیزې لوبلړۍ پایلوبې ته لار ومونده.
د افغانستان نولس کلنې کم عمره کرکټ ملي لوبډلې د روانو درې اړخیزو سیالیو په لړ کې، خپله څلورمه لوبه د سریلانکا پر وړاندې ترسره کړه، چې پکې یې د نعمان شاه، محمد هارون او سهیل خان د غوره توپوهنې په مټ وکولی شول، خپلې سیالې لوبډلې ته ۳۲۳منډې هدف کېږدي.
د دغې سیالۍ په دویمه پاڼۍ کې افغان لوبډلې د غوره توپ اچونې په مټ خپلې سیالې لوبډلې ته په څلورو منډو ماتې وکړه او د یادو سیالیو پایلوبې ته یې لار ومونده.
د دې سیالۍ غوره لوبغاړی بشیر احمد افغان و، چې د سریلانکا لوبډلې ۷ لوبغاړي يې وسوځول .
په دې سره افغان لوبډلې په روانو درې اړخیزو سیالیو کې درېيمه بریا خپله کړه او د لومړي پړاو د مخکښې لوبډلې په توګه یې د یادو سیالیو پایلوبې ته لاره ومونده، چې د راتلونکې پنجشنبې په ورځ به ترسره شي.
هېره دې نه وي چې دغه سیالۍ د افغانستان په کوربتوب ترسره کېږي او د افغان لوبډلې په ګډون پکې د بنګلدېش او سریلانکا د کرکټ له نولس کلنو کم عمره ملي لوبډلو هم ګډون کړی دی.
