افغان کرکټ لوبډلې پاکستان ته په دويمه لوبه کې په اووه ويکټو ماتې ورکړه
د افغانستان کرکټ ملي لوبډلې خپلې سيالې پاکستانۍ لوبډلې ته د اماراتو هيواد په شارجه نړيوال لوبغالي کې د درېوو شل اوریزو لوبو له لړۍ څخه په دویمه لوبه کې په ۷ ويکټو ماتې ورکړه.
د يادې سيالي پچه پاکستان لوبډلې وګټله او لومړی يې د توپ وهنې پرېکړه وکړه، چې له شلو اورونو لوبولو وروسته وتوانېدله د ۶ لوبغاړو په سوځېدو سره خپلې سيالې افغان لوبډلې ته ۱۳۱ منډې هدف کېږدي.
د افغانستان لپاره فضل الحق فاروقي ۲وېکټې, راشد خان، نوين الحق او کريم جنت یوه ـ یوه ويکټه ترلاسه کړه.
بل پلو افغان لوبډلې د رحمن الله ګربز په ۴۴منډو وکولای شول، چې په وروستي اور کې ياد هدف ته ځان ورسوي او دغه ستره بريا ترلاسه کړي له دې سره افغانستان د یاد سريز ګټونکی هم شو.
د یادې لوبې غوره لوبغاړی فضل الحق فاروقي ونومول شو، چې په څلور اورونو کې یې ۱۹ منډې ورکړې وې او دوه لوبغاړي یې سوځولي وو.
بايد يادونه وشي، چې دغه سريز د افغانستان په کوربتوب، د اماراتو هيواد په شارجه لوبغالي کې ترسره کېږي، چې په پيل کې افغان لوبډلې د نوموړي سريز لومړۍ او دويمه لوبه وګټله او سبا دوشنبه به یې وروستۍ لوبه ترسره شي.
