هرات؛ د سپورټ ادارې غصب شوې ځمکې له پېژندنې وروسته بېرته راګرځول کېږي
دغه مطلب د هرات ولایت د بدني روزنې او ورزش رئيس ښاغلي ګلاب الدین خپلواک وړاندې کړ.
هغه د هرات ښاروالۍ له يوه پلاوي سره ماهي خرڅوونکو ښارګوټي ته د ځمکې د برسۍ او پلټنې په موخه تللى و، په خپل مطلب کې يې زیاته کړه: هغه ٢٣ جريبه ځمکه، چې د ماهي خرڅوونکو د ښارګوټي د خاوند له خوا د ورزشي کمپلکس د جوړولو لپاره ځانګړې شوې وه او د بدني روزنې او سپورټ رياست یې شرعي قباله هم اخیستې وه، له بده مرغه چې د ځايي خلکو او ځينو زورواکو له خوا د چارواکو د نه پاملرنې له امله غصب شوې وه، چې بېرته د هرات ورزش رياست ته راوګرځول شوه.
د ماهیانو خرڅوونکو ښارګوټی د هرات ښار په دولسمه ناحيه کې موقعيت لري، چې د جوړولو چارې يې په ۱۳۹۳کال کې پيل شوي دي او د دغه ښارګوټي د مالک له لوري د ياد ښارګوټي د ځوانانو د ورزشي فعاليتونو لپاره شاوخوا ٢٣ جريبه ځمکه، د هرات ولایت د بدني روزنې او ورزش رياست ته ورکړل شوې وه.
ښاغلی خپلواک وایي: له دغې ځمکې څخه به په راتلونکي کې د ورزشي کمپلکس د جوړولو لپاره کار واخیستل شي، د ښاغلي خپلواک په وینا نورې ځمکې هم شته، چې د شیدايي او کهدستان د ښارګوټو د مالکینو له لوري د هرات د بدني ورزنې او سپورټ ریاست ته په پام کې نیول شوې دي، چې د هرات ښاروالۍ او اړوندې ناحیې له څېړنې وروسته به ورغول شوي.
هر کله چې دغه ځمکې خپل اصلي خاوند د (هرات د بدني روزنې او سپورټ ریاست) ته وسپارل شي، په دغه ولایت کې به په ورزشي سکټور کې د پانګونې په برخه کې زمینه مساعده شي او د هرات ورزشکاران به د څو ورزشي کمپلکسونو خاوندان شي.
هرات یو له هغو ولایتونو څخه دی، چې له کابل وروسته تر ټولو ډېر ورزشکاران لري او په بېلابېلو ورزشي رشتو کې يې زیات شمېر ځوانان د ملي لوبډلو غړیتوب لري.
که څه هم په دغه ولایت کې په تېرو شلو کلونو کې د بدني روزنې او سپورټ رياست له لوري يوازې يو جمنازيوم جوړ شوی؛ خو په هرات ولایت کې خصوصي سکټور د ورزشي اسانتياوو په برابرولو او د ورزش په وده او پرمختګ کې د پام وړ رول لوبولی دی.
