د المپيک ملي کمېټې او سپورت عمومي رياست رئيس د غزني په جاغوري ولسوالۍ کې له ورزشي نندارو څخه ليدنه وکړه
د المپیک ملي کمېټې او سپورټ عمومي رياست رئیس انجنیر نظرمحمد مطمئن د غزني ولایت جاغوري ولسوالۍ ته د خپل سفر په ترڅ کې د تکواندو، کونګ فو، کراټې، فوټسال او والیبال له لوبو او نندارو څخه لیدنه وکړه.
په دې سفر کې له ښاغلي مطمئن سره د بدني روزنې او سپورټ د عمومي ریاست د دفتر رئیس محمد الله احساس، د غزني ولایت د ورزش آمر حاجي بلال مجاهد او ډاکتر جعفر مهدوي ملګري وو.
ښاغلي مطمئن د سیالیو او نندارو ګډونوالو ته د وینا پر مهال ژمنه وکړه، چې د غزني ولایت د بدني روزنې او سپورټ آمریت په چوکاټ کې به د جاغوري ولسوالۍ لپاره د یوه رسمي بست د رامنځته کولو لپاره هڅې وکړي.
ښاغلي مطمئن زیاته کړه: « خوښ یم چې په جاغوري کې شتون لرم او دا په هېواد کې لومړۍ ولسوالي ده، چې د المپیک ملي کمېټې او سپورټ عمومي رياست مشرتابه یې لیدنه کوي.»
ورپسې د بدني روزنې او سپورټ عمومي ریاست د دفتر رئیس ښاغلي محمدالله احساس خبرې وکړې او ویې ویل: «ستاسو د کوچني ورور په توګه به په جاغوري ولسوالۍ کې د سپورټ د ودې لپاره ستاسو تر څنګ کار کوم.»
نوموړي له ګډونوالو څخه غوښتنه وکړه، چې د نن په څېر تل خپل یووالی وساتي، یو بل ومني او له یوه بل سره همکار پاتې شي.
ډاکټر جعفر مهدوي په خپلو خبرو کې د هېواد د المپیک د ملي کمېټې او سپورټ عمومي رياست له رئیس او ورسره مله ټیم څخه مننه وکړه، چې د خپل مصروف مهالوېش باوجود یې ورزش ته د ځوانانو د هڅولو په موخه په لېوالتیا سره پر ستونزمنو لارو جاغوري ته سفر وکړ.
د يادونې وړ ده، چې د دغو مراسمو په پاى کې د ستارهګران جاغوري او طوفان داوود لوبډلو ترمنځ د فوټسال لوبه ترسره شوه، چې له ۴-۴ مساوي ګولونو سره پای ته ورسېده.
د فوټسال لوبې له پای ته رسېدو وروسته د امید داله او مسیر افتاب د لوبډلو ترمنځ د والیبال سيالي وشوه، چې د وخت د کموالي له امله مساوي پای ته ورسېده.
د يادونې وړ ده، چې په پاى کې د هېواد د سپورټ ادارې د مشرتابه له لوري د بېلابېلو برخو ورزشکارانو ته ډالۍ هم ووېشل شوې.
