خوست؛ د فوټبال غوره لیګ سیالۍ پیل شوې
د خوست ولایت د فوټبال غوره لیګ سیالۍ پرون جمعه د ۱۴ لوبډلو ترمنځ د ځانګړو مراسمو په ترڅ کې پیل شوې.
د خوست ورزش امر عطاء الله کډوال د لیګ د پیل مراسمو ته په وینا کې د لیګ په پیلېدو خوښي وښوده او تر څنګ یې د خوست ولایت په ورزشي بهیر رڼا واچوله.
د خوست ولایت د فوټبال فدراسیون د مشر ولي ګلاب زوی په خبره د یاد غوره لیګ په سیالیو کې څوارلس لوبډلې شتون لري، چې هره لوبډله به ۱۳ لوبې ترسره کوي.
ددې لیګ د پیل لوبه د خوست ولي ګلاب زوی اکاډمۍ او پکتیا تلاش لوبډلې ترمنځ وه، چې د ۲-۱ په توپیر ولي ګلاب زوی اکاډمۍ په خپل نوم کړه.
د لیګ په اوږدو کې به ټولې ۹۱ سیالۍ وشي او تر یوې نیمې میاشتې به روانې وي.
