د آشي هاراکاراته د ملي سیالیو پنځلسم پړاو نن په کابل کې پیل شو
په دې سیالیو کې له دیارلس ۱۳ ولایتونو نږدې ۳۰۰ تنو ورزشکارانو ګډون کړی، چې په ملي ټیم کې د غړیتوب لپاره به اووه ورځې دوام وکړي.
د پیل په مراسمو کې د المپیک ملي کمېټې او سپورټ عمومي ریاست رئیس نظر محمد مطمین له ولایتونو څخه په پلازمېنه کابل کې د ورزشکارانو په راتګ خوښي وښوده او زیاته یې کړه:
تاسې ورزشکاران، چې اکثر یې متعلمین یا محصلان هم یئ ، بېرته له تګ وروسته په ولایتونو کې ځوانان ورزش ته تشویق کړئ، نننۍ ستاسې د "الله اکبر " نعرې له هیواد او خاورې څخه د دفاع په خاطر ستاسې د عزم او ارادې ښکارندوي کوي، دا هغه نعرې دي، چې زموږ د ملت له حنجرو راووتلې او سترځواکونه یې را وپرزول. له ښه مرغه دا نعرې نن ستاسې له ستونو راوتللې، دا عبادت او توحید پرستۍ ته ستاسې د ارادو نماینده ګي کوي.
همدا ډول د المپيک ملي کمېټې رئیس د آشي هاراکاراته فدراسیون رئیس ته دنده وسپارله، چې د سیالیو له ختمېدو وروسته ورزشکارانو ته د پلازمېنې کابل له تاریخي او فرهنګي ځایونو د لیدنې زمینه مساعده کړي.
