غزني؛ په قره باغ ولسوالۍ کې د فوټبال ورزشي لوبغالی پرانیستل شو
هغه مراسم چې په همدې موخه د غزني په قره باغ ولسوالۍ کې جوړ شوي وو، د غزني والي الحاج مولوي محمد اسحاق اخندزاده، د میدان وردګو والي حافظ محمد امین عمري، د بدني روزنې او ورزش عمومي ریاست د دفتر رئیس محمد الله احساس، محمد اعظم کوهي د فدراسیونونو آمر او نورو چارواکو ګډون کړی وو.
دغه لوبغالي په قره باغ ولسوالۍ کې د ملي سوداګر حاجي عبدالصمد مياخېل له خوا د دوه ميليونه افغانيو په لګښت په درې جريبه ځمکه کې جوړ شوی دی.
د پرانیستې په مراسمو کې د غزني والي مولوي اسحاق اخندزاده وویل: زه پر ټولو ورزشکارانو غږ کوم چې د ورزش پر مهال خپل لمونځونه هېر نه کړئ، ځکه د پنځه وخته لمونځونو ادا کول د دنیا او آخرت د سعادت لامل ګرځي.
محمدالله احساس د بدنې روزنې او ورزش د مقام د دفتر ریس د پرانیستلو په مراسمو کې ګډونوالو ته په خطاب کې وویل: د خوښۍ ځای دی چې زموږ د سوداګرو په منځ کې دا احساس شته چې خپله ځمکه د خدای د رضا او د ورزش د ودې لپاره وقف کوي او ځوانانو د نشه یی توکو څخه لرې ساتې.
هغه زياته کړه: د بدني روزنې او ورزش عمومي رياست او د المپيک ملي کمېټه تل د ورزشکارانو په خدمت کې ده او ورزشکارانو هوساینې لپاره له هیڅ ډول اسانتیاوو برابرولو څخه به ډډه ونه کړي.
د بدني روزنې او ورزش د مقام د دفتر رئیس په خپلو خبرو کې ورزشکارانو ته ویې ویل: د ولایتونو په مرکزونو کې سیالی په بریالیتوب سره ترسره شوې اوس محال د بدنې روزنې او ورزش ریاست رهبري هوډ لري چې په ټولو ولسوالیو کې بېلابېلې ورزشي سیالۍ ترسره کړي هغه زیاته کړه له نیکه مرغه دغه پروګرام له قره باغ ولسوالۍ پیل شو.
د غزني قره باغ ولسوالي د غزني سوېل لوېديځ ته په ۵۶ کيلومترۍ کې پرته ده او شاوخوا ۱۶۷ زره نفوس لري.
د دې لوبغالۍ د جوړیدو څخه ورزشکاران خوښ دي او وايي چې د دا ډول میدانونو په جوړېدو سره به په قره باغ کې ورزش ډیر زر وده ورکړي.
د یادولو وړ ده چې د دغو مراسمو به څنډه کې د مختلفو رشتو نیزه بازۍ، جمناسټیک، کورش سامبو، کراټې، ووشو او بایسکل ځغلونې په زړه پورې نندارې هم ترسره شوې.
