د هرات سرخپوشان د فوټبال غورهلیګ لومړی مقام نیولی دی
د هرات لوبډله د لوړو نمرو په ترلاسه کولو سره د افغانستان د فوټبال غورهلیګ په سر کې ځای نیولی دی.
د هرات لوبډله د هېواد د فوټبال غورهلیګ سیالیو د اتلولۍ ګټلو په تمه ده، چې تر اوسه یې د نهو لوبو په کولو سره ۳۲ نمرې ترلاسه کړي او د جدول په سر کې ځای لري.
د کابل استقلال لوبډله د ۱۸ نمرو او خدیم اف سي لوبډله د ۱۶ نمرو په لرلو سره د جدول په دویم او درېیم مقامونه کې ځای لري. همدارنګه د پروان لوبډلې په اوو لوبو کې یوه هم نه ده ګټلې او د جدول وروستي مقام ته غورځېدلې ده.
یادې سیالۍ د دولسو کلپونو تر منځ پیل شوې دي، چې څه موده وړاندې یې له فوټبال فدراسیون څخه د فعالیت جواز ترلاسه کړی و.
دغه لوبې د روانې کب میاشتې په یوولسمه نېټه د کندهار ولایت په احمدشاهي لوبغالي کې پیل شوې دي او تر اوسه دوام لري.
د سرپل خدیم، د کابل استقلال، د هرات سرخپوشان، د فراه ابومسلم، د هلمند عصمت لغماني، د تخار مواجساحل، د خوست د کندهار عینو مېنه، د لغمان ځوانان، د پروان جبل السراج، د فاریاب خراسان او د کندز ځوانان هغه لوبډلې دي چې په دغو سیالیو کې لوبېږي.
د یادونې وړ ده، چې د افغانستان د فوټبال غورهلیګ درې مخکني پړاوونه په کابل، بلخ او هرات کې شوي دي او اوس څلورم پړاو د کندهار په کوربهتوب روان دی، چې ۴۸ لوبې یې پاتې دي.
